Act 6 | DOB | STEP | Tuta gote 'ena Yesu 'ana toemisao 'idi boda 'isinasinabwa, ga 'ediyega to'ena Gilisi 'idi bodao to'ena Yudiao silomugiyedi, manuna 'asiyata 'ebweuna 'ebweuna, 'abo tuta nina masula sieguyaiyedi kwabulao 'ediya, taudi to'ena Gilisi 'idi kwabulao 'adi masula nigeya sawesawediya, 'enega sibotabotana.

Acts 6

To'ita'i'itao site sebeni siesinuwedi

1 Tuta gote 'ena Yesu 'ana toemisao 'idi boda 'isinasinabwa, ga 'ediyega to'ena Gilisi 'idi bodao to'ena Yudiao silomugiyedi, manuna 'asiyata 'ebweuna 'ebweuna, 'abo tuta nina masula sieguyaiyedi kwabulao 'ediya, taudi to'ena Gilisi 'idi kwabulao 'adi masula nigeya sawesawediya, 'enega sibotabotana.

2 'Enega Yesu 'ana tosimanao site tuwelo toemisao maibo'adi sibwauyedima, ga sigwae, “Nigeya sawesawenaya Yaubada 'ina ona 'ana loguguya 'alosa'u be 'aene masula 'aeguyai. 3 'Enega 'omi 'emiyega tai sebeni waesinuwedi, yaisigedi ma 'adi 'amayaba, ta sinasinapudi, ta wate 'abo Yaluyaluwa Tabuna 'ina waiwai 'ediya, be paisewa gete masula 'ana eguyai manuna, 'ada 'ebwa'edi. 4 Ta 'abo'ama 'ada etapewa sidasida manuna, ta wate Yaubada 'ina ona 'ana e'ita manuna.”

5 Ta boda sigwausowala 'idi loina gete manuna, 'enega site sebeni siesinuwedi getedi, Sitibeni, tauna 'ina emisa sinabwana Yesu 'ena, ta Yaluyaluwa Tabuna 'ina waiwai 'ena, be Pilipi be Pilokolo be Nikano be Timoni be Pamena be wate Nikola, tauna goma Anitioki ta ni'atu me Yudia 'idi tapwalolo 'ena 'ilugu. 6 'Enega tai getedi sigilagasidi Yesu 'ana tosimanao matadiya, ta sigidebedi ga manudi sisidasida Yaubada 'enaya, ga guinuwa nina sie'alidi.

7 'Enega Yaubada 'ina ona 'iewaiwai tomota 'ediya, ga tomuliyao 'adi boda 'isinabwa wawasae sena Yelusalema 'enaya, ta totaliyao yaudi wate ona nina sinonona, ga Yesu siemisena.

Sitibeni sigiyaina

8 Ta Sitibeni nina ma ina waiwai, ta ma ina oboboma sinabwana, ga guinuwa 'ebe nuwaowana ta we'iwe'iyayao 'iguinuwedi tomota gamwagamwanidiya.

9 Ta 'aina tomota simai ga Sitibeni ma'ediya siegewagewana, taudi 'aina me Yudia 'idi tapwalolo sieesena “Li'ali'amina,” ta 'aidi Sailini 'enega, ta 'aidi Alekisanidela 'enega, ta 'aidi Silisia be Esia 'ediyega, 10 ta nigeya sawesawenaya siewaiwai, manuna Sitibeni 'ina ona sinasinapu Yaluyaluwa Tabuna 'enega.

11 'Enega taudi Sitibeni sisipupuyena ga 'aina tomota sieonedi be Sitibeni sida e'ewa, sigwae, “Sitibeni nina 'ina ona to'umalina 'anononaya, nate Mosese be Yaubada 'i'awa to'umaliyedi.” 12 Ta wate tomota sienuwa sa'uyedi ga Sitibeni nina sietalauwalena, 'enega boda yaudi be 'inapwanao be wate loina 'ana toe'itao simai ga sigiyaina, ga si'au'ewena toloinao 'idi deliegogona 'enaya, 13 ta toe'ewa kabokabo nidi sibwauyedima, ta taudi sigwae, “Tai gete, tuta yauyauna 'ediya, Mosese 'ina loinao be Anuwa Tabu gete wate 'isinalidi, 14 ta wate 'ina ona 'anononaya 'igwae, ‘Yesu tauna goma Nasaleta ma'etamo Anuwa Tabu gete 'ida ligeiyaule, be 'ida guinuwao nidi Mosese 'i'ebwa'eda 'ida sa'ugelasedi, be dumadumadi 'isa'udi.’ ”

15 Ta todeliegogona nidi maibo'adi Sitibeni maninina siduneyena, 'ana 'ita anilose maninina nadigega.